Techie IT

राष्ट्रपति कार्यालयको आँगनमा देउसी–भैलो


राष्ट्रपति कार्यालय शीतल निवासको प्राङ्गणमा आज बिहीवार सांस्कृतिक संस्थानका कलाकार र बाल मन्दिरका बालबालिकाले देउसी–भैलो प्रस्तुत गरेका छन् ।

राष्ट्रपति विद्यादेवी भण्डारीको उपस्थितिमा ती कलाकारले देउसी–भैलोसहित नेपालका विभिन्न क्षेत्र र भू–भागका लोक संस्कृति प्रस्तुत गरेका थिए ।

त्यस क्रममा सांस्कृतिक संस्थानका ३० जना कलाकारले नेपालको पूर्व र पश्चिमका देउसीसहित नुगेको डाली, साकेला, घरपट्टि नानी, तिहारै आयो, टप्पा, रोयला, असारे महिनाजस्ता लोक–सांस्कृतिक कार्यक्रम प्रस्तुत गरेका थिए ।

त्यसै गरी बाल मन्दिरका बालबालिकाले पनि देउसी–भैलो प्रस्तुत गरेका थिए । राष्ट्रपति भण्डारीले देउसी–भैलो प्रस्तुत गर्ने कलाकार टोलीलाई सेलरोटी, फलफूल र दक्षिणासमेत प्रदान गर्नुभएको थियो ।

उहाँले देउसी–भैलोलाई दिइने परम्पराअनुसार नै बलेको दियो नाङ्लोमा राखेर चामल र सेलरोटीसहितको दक्षिणा आफैँले दिनुभएको थियो ।

राष्ट्रपति भण्डारीले आफ्ना मौलिक गीत, सङ्गीत, कला र साहित्यले जुनसुकै देशलाई पनि समृद्ध बनाउन सहयोग पुर्‍याउने भन्दै नेपालको लोक संस्कृति विश्वमै विशिष्ट र अद्वितीय रहेको बताउनुभयो ।

उहाँले सांस्कृतिक संस्थानले नेपालको लोक–संस्कृति र परम्पराको संरक्षण र प्रवर्द्धनमा निर्वाह गरेको भूमिका अतुलनीय रहेको भन्दै आज प्रस्तुत देउसी–भैलोका लागि सबै कलाकारलाई विशेष धन्यवाद दिनुभयो ।

उहाँले कोरोना महामारीले असहज बनाएको नेपाली समाज र देशको अवस्थालाई सहजतातर्फ उन्मुख गराउन यस्ता सांस्कृतिक कार्यक्रमहरूले पनि योगदान पुर्‍याउन सक्ने बताउनुभयो ।

राष्ट्रपति कार्यालयको आँगनमा यसरी आफ्ना प्रस्तुति दिन पाएकामा कलाकारहरूले निकै खुसी व्यक्त गरेका थिए ।


क्याटेगोरी : मनाेरञ्जन, समाचार, समाज


प्रतिक्रिया दिनुहोस