स्थानिय सरकारको स्वेच्छाचारी विरुद्ध जुटे रामारोशनका युवाहरु

धनराज साउँद २०७७ असार २२, सोमबार २०:४२

अछामको रामारोशन गाउँपालिकामा स्थानिय सरकारको स्वेच्छाचारी विरुद्ध स्थानिय युवायुवतीहरु जुटेका छन् ।

गाउँपालिकाको वडा नं ३ पसेलामा विनोद लुहारको नेतृत्वमा १४ सदस्यीय टोल स्तरिय पसेला युवा सरोकार अभियान समिति बनाएको उक्त समितिका अध्यक्ष विनोद लुहारले जानकारी दिएका छन् ।

स्थानिय निर्वाचनताका युवायुवतीहरुलाई रोजगारीको ग्यारेन्टी गर्छौ भन्ने वर्तमान स्थानिय सरकारका नेतृत्वकर्ताहरुले स्थानिय सरकार गठन भएको ३ बर्ष पुगिसक्दा पनि आफ्नो आसेपासे नातेदार बाहेक कुनै पनि युवायुवातीहरुलाई रोजगारीको व्यवस्था नगरेको र झन उल्टै विकासको नाममा भ्रष्टचारलाई संस्थागत गर्दै गएकोले आफुहरु बाध्य भएर नेपालको संविधान २०७२ ले प्रत्याभुत गरेको आफ्नो अधिकारको लागि स्वतन्त्र युवाहरु संगठित हुनपरेको लुहारले जानकारी दिए ।

साथै कोभिड – १९ कोरोना भाईरसका कारण रामारोशन गाउँपालिकामा अहिले सम्म १ जनाको मृत्यु र करिब सयको हाराहारीमा कोरोना संक्रमित पुगिसक्दा पनि स्थानिय सरकार असारे योजनाको नाममा उपयोग विहिन क्षेत्रमा आसेपासे कार्यकर्तालाई गोप्य रुपमा रकम निकासी गर्नमै व्यस्त रहेको छ ।

कोरोना रोकथाम तथा नियन्त्रण विधि थप प्रभावकारी नबनाउने हो भने गाउँपालिकाको स्थिति झन भयावह हुने निश्चित भएकोले यस तर्फ पनि सरकारको ध्यानाकर्षण गराउन आफुहरु एकजुट भएको उनले जानकारी गराए ।

हरेक राजनैतिक पार्टीहरुले सत्तामा नपुगुन्जेल मात्र युवायुवतीहरुलाई उपयोग गरेको कारण अब उपरान्त कुनै पनि राजनैतिक दलको झण्डा नबोकी स्वतन्त्र युवाहरु समाजको बेरोजगारी, बेथिति, अत्याचार र भ्रष्टाचारको विरुद्ध एकजुट हुने उद्देश्यका साथ आफुहरु संगठित भएको र यस अभियानलाई वडा, गाउँपालिका र जिल्ला व्यापि बनाउने पनि अध्यक्ष विनोद लुहारले जानकारी दिए ।

क्याटेगोरी : मुख्य समाचार, समाचार, समाज, स्थानीय, हेडलाईन