पालिका स्तरीय पोषण तथा खाद्य सुरक्षा निर्देशक समितिको बैठक मंगलसेनमा सम्पन्न

एकेन्द्र थापा २०७७ चैत्र ८, आईतबार १८:१६

पालिका स्तरिय पोषण तथा खाद्य सुरक्षा निर्देशक समितिको बैठक मंगलसेन नगरपालिकामा सम्पन्न भएको छ । नगरप्रमुख पदम बहादुर बोहराको अध्यक्षतामा भएको बैठकले बिभिन्न विषयमा छलफल तथा निर्णय पारित गरेको छ ।

बैठकले नेपाल सरकारले नगरको पोषण योजनाका लागि उपलब्ध गराएको ३२ लाख ६५ हजार ससर्त अनुदान र नगरपालिकाको ९ लाख समानिकरण अनुदान अनुमोदन सहित क्षेत्रगत बिनियोजन गरेको छ ।

जसलाइ सुशासन क्षेत्र, खानेपानी, शिक्षा, कृषि, पशुसेवा, महिला बालवालिका र स्वास्थ्यका क्षेत्रमा बिनियोजन गरिएको छ । बैठकमा आफ्नो धारणा राख्दै नगरप्रमुख पदमबहादुर बोहराले समुदाय स्तरमा पोषण प्याकेजलाई पुर्याँउन सबै लाग्नुपर्ने बताउनुभयो ।

नगरपालिकाले गरेको लगानीबाट उपलब्धी प्राप्त गर्ने गरि काम हुनुपर्नेमा उहाँको जोड थियो । बैठकमा नगरलाइ पोषणयुक्त नगर बनाउनका लागि गर्नुपर्ने कामकार्यका बिविध पक्षबारे पनि छलफल भएको नगरपालिकाका सूचना अधिकारी बिष्णुप्रसाद जैशीले बताउनुभयो ।

बैठकमा नगर उपप्रमुख सरिता उपाध्याय, १४ वटै वडाका वडा अध्यक्षहरु, नगरको सम्पूर्ण विषयगत शाखाका प्रमुख लगायतको उपस्थती रहेको थियो ।

निमित्त प्रमुख प्रशासकीय अधिकृत खकेन्द्र बहादुर सोडारीले कार्यक्रमको उदेश्यमाथि प्रकाश पार्नुभएको कार्यक्रममा सुआहारा कार्यक्रमका जिल्ला संयोजक लोक बहादुर नेपालीले बहुक्षेत्रीय पोषण को अवधारणाका बारेमा जानकारी गराउनुभएको थियो ।

कार्यक्रमको सञ्चालन नरेश बहादुर कठायतले गर्नुभएको एम आई एस अपरेटर होम बहादुर साउदले जानकारी दिनुभयो ।