नगरप्रमुख बोहराद्वारा प्रकोप व्यवस्थापन कोषमा एक लाख ५ सय सहयोग

बान्नीगढी संवाददाता २०७८ जेठ २, आईतबार १५:५३

मंगलसेन नगरपालिकाका नगरप्रमुख पदमबहादुर बोहराले नगरको प्रकोप व्यवस्थापन कोषमा १ लाख ५ सय रकम सहयोग गर्नुभएको छ ।

नगरप्रमुख बोहराले १ लाख ५ सयको चेक कोषमा जम्मा गर्ने गरी नगरपालिकाका निमित्त प्रमुख प्रशासकीय अधिकृत विष्णुप्रसाद उपाध्यायलाई हस्तान्तरण गर्नुभएको हो ।

कोरोना सङ्क्रमणको जोखिम न्यूनीकरणका लागि सहयोग पुगोस् भन्ने हेतुले आफूले कोषमा सहयोग गरेको नगरप्रमुख बोहराले बताउनुभयो ।

आफू कोरोना सङ्क्रमित भएर कोरोना बिमा वाफत प्राप्त गरेको रकममा आफूले पनि केही रकम थप गरेर प्रकोप व्यवस्थापन कोषमा जम्मा गरिदिएको उहाँको भनाइ छ ।

कोरोना सङ्क्रमित भएर पनि आफू अहिले स्वस्थ रहेको भन्दै सङ्क्रमित अन्य नागरिकहरूको ज्यान जोगाउन अक्सिजन सिलिन्डर लगायतका स्वास्थ्य सामग्री खरिदमा सहयोग पुगोस् भन्ने चाहना रहेको बोहराको भनाइ छ ।

नगरप्रमुख बोहराले गत वर्ष पनि नगरपालिकाको कोरोना कोषमा १ लाख ५ सय सहयोग गर्नुभएको थियो ।

मंगलसेन नगरपालिकाको प्रकोप व्यवस्थापन कोषमा जम्मा भएको रकमबाट आवश्यकता अनुसार नगरपालिकाका स्वास्थ्य संस्थाका लागि आवश्यक पर्ने अक्सिजन सिलिन्डर र स्वास्थ्य सामग्री खरिद तथा व्यवस्थापनमा खर्च गर्न सकिने नगरपालिकाले जनाएको छ ।

क्याटेगोरी : समाचार, समाज, स्थानीय

बान्नीगढी संवाददाता